Монголчууд хийгээд нүүдэлчдийн амьдралын хэв маягийг мэдрэх онцгой туршлага бол гэрт тухлан саатах явдал гэдэгтэй хэн ч маргахгүй биз ээ. Хэрэв та Монголд айлчлахаар шийдсэн бол үзэсгэлэнт онгон байгалиар хүрээлүүлсэн Монголын олон арван гэр буудлуудаас сонголтоо хийх боломжтой. Түүнчлэн эгэл малчин айлын гэрт ч хоноглох боломж бий. Тэгвэл бусад улсуудад ч мөн нүүдэлчдийн ахуйг таньж, монгол гэрт хоноглож байгалийн сайхныг мэдрэх олон газар байдаг.
Та бүхэнд дэлхий даяар тархсан 10 онцлох нүүдэлчдийн сэдэвт гэр буудлын жагсаалтыг танилцуулж байна.
1. Чили улс, Патагони. Торрес-дель-Пайне үндэсний цогцолборт газарт байрлах Patagonia camp нь бүрэн тохижуулсан хорин монгол гэрээс бүрддэг тансаг зэрэглэлийн гэр буудал юм. Гэр буудлаас үзэсгэлэнт байгалийг тольдох боломжтой бөгөөд аяллын тусгай хөтөлбөрт ч хамрагдаж болно.
Вэбсайт: https://patagoniacamp.com/en/
2. Шотланд, ИБУИНВУ. Зүүн хойд Пертширийн өндөрлөгт байрших Рамсейн гэр бүлийн эдлэнд байгаль хамгааллын төслүүд хэрэгждэг. Түүнчлэн эко аялал жуулчлалыг хөгжүүлж буй Рамсейн гэр бүлийн эдлэнд олон төрлийн сууцад тухлан саатах боломжтой бөгөөд сонголтод нь хоёр монгол гэр бий. Байгаль хамгааллын үйлсэд хувь нэмрээ оруулахын сацуу монгол гэрт хоноглох нь сайхан биш гэж үү?
Вэбсайт: https://www.bamff.co.uk/
3. Амеркийн Нэгдсэн Улс. АНУ-гийн Калифорни, Охайо, Техас, Индиана, Аляска зэрэг олон мужуудад гэр буудлуудад саатах боломжтой. Энэхүү жагсаалтад бид Калифорнийн Биг Сурийн эрэгт байрлах Tree Bones Resort-ийг онцолж байна. Тус буудалд бууснаар Номхон далайн үзэсгэлэнт эргийг тольдон монгол гэрт тухлах боломжтой.
Вэбсайт: https://www.treebonesresort.com/
4. Шинэ Зеланд. Веллингтон мужийн Грейтаунд байрших Yurtopia Luxury Glamping Hotel-д байрлах монгол гэрээс сэдэвлэсэн орчин үеийн бүрэн тохижилттой гэр бий. Грейтаунд байрших тус монгол гэрийг та Booked.net, Airbnb.com зэрэг өөрийн дуртай сайтаас захиалах боломжтой.
Вэбсайт: https://yurtopia-luxury-glamping-greytown.booked.net/
5. Танзани. Серенгити үндэсний хүрээлэн. Үзэсгэлэнт үндэсний хүрээлэн, Нгоронгоро кратер, Натрон нуураар хүрээлүүлсэн Nduara Loliondo хагас нүүдлийн хэлбэрийн тансаг буудал нь зургаан монгол гэртэй. Африкийн уулга алдам байгалийн үзэсгэлэн, зэрлэг амьтдын дунд монгол гэрт тухлаарай. Та Африкийн Сафари аялал санал болгодог операторуудаар дамжуулан гэрээ захиалаарай.
6. Хятад. ӨМӨЗО-ы Ордос. Монгол говийн үргэлжлэл болсон элсэн цөлд Дуут манхны булан (Xiangshawan) хэмээх томоохон аялал жуулчлалын бүс бий. Тус бүсэд байрлах Desert Lotus Resort тансаг зэрэглэлийн зочид буудал нь монгол сэдэвт дизайн, арга хэмжээ, аялал, зугаа цэнгэл, гүнцэг зоогоороо алдартай.
Вэбсайт: https://www.ixsw.cn/en/index.asp
7. Киргиз. Кажи-Сай тосгон. Тунгалаг цэврээрээ алдартай Иссык Куль нуурын өмнөд эрэгт “Оймо Таш” хэмээх гэр хотхон бий. Тус этно хотхонд та Киргиз үндэсний гэрт тухлан саатах боломжтой.
Вэбсайт: http://www.oimotash.kg/
8. Казахстан. Алма-Ата хот. Хотоос холгүй алдарт Чимбулак цанын бааз бий. Тус цанын бааз Тяншанийн уулсын нөмөрт далайн түвшнээс дээш 3200 метрийн өндөрт цасанд дарагдан казак гэрүүд үзэгдэнэ. Казак үндэсний гэрт, казак түмний зоог хүртэн уулын цэвэр агаараар амьсгалж идэвхтэй амрахыг хүсвэл YURTA буудалд саатаарай!
Вэбсайт: https://www.instagram.com/yurta_shymbulak/
9. Испани. Кортес-де-ла-Фронтера. Нарлаг Испанид Тhe Hoopoe Yurt буудал бий. Тус зочид буудал нь чидуны төгөл, үйсэн царсны ойд орших бөгөөд Андалусийн Гразалема уулсын гайхалтай үзэмжтэй.
Вэбсайт: http://www.yurthotel.com/
10. Монгол улс. Өмнөговь аймаг, Булган сум. Тус сумын Булагтай уулын энгэрт “Говийн Гурван Тэмээ” тансаг зэрэглэлийн жуулчны бааз бий. Тус бааз нь олон мянганы түүхтэй монгол гэрийг орчин үеийн хэв маягтай хослуулан бүтээсэн ба ариун цэврийн өрөө болон унтлагын өрөө бүхий тансаг зэрэглэлийн 40 гэртэй. Сүмийн загвартай Булагтай ресторан нь монгол болон европ хоолтой. Говийн үзэсгэлэн, өвөрмөц тансаг гэрүүд, гойд орчин нь мартагдахын аргагүй сэтгэгдэлийг танд үлдээнэ.
Вэбсайт: https://www.threecamellodge.com/
